အခန်း ၁၈ ဆီးလမ်းကြောင်းနှင့် လိင်အင်္ဂါဖွဲ့စည်းပုံများ

ခေါင်းစဉ်များ

လူတို့၏ ဆီးလမ်းကြောင်းသည် သွေးထဲရှိ စွန့်ပစ်ပစ္စည်းများကို ဆီးအဖြစ် ခန္ဓာကိုယ်၏ အပြင်သို့ စွန့်ထုတ်ခြင်း ဟူသော လုပ်ငန်းကို လုပ်ဆောင်သည်။

အမျိုးသားတွင်

အမျိုးသမီးတွင်

ဆီးလမ်းကြောင်းတွင် ဖြစ်ပွားသော ပြဿနာများ

ဆီးလမ်းကြောင်းတွင် ဖြစ်ပွားသော ရောဂါများစွာ ရှိပါသည်။ တစ်ခုချင်းစီ ခွဲပြောရန် မလွယ်ကူပါ။ ကျား၊မ မရွေး ဖြစ်ပွားနိုင်သော လက္ခဏာများရှိသည်။ ဤရောဂါများထဲမှ အချို့မှာ မပြင်းထန်လှသော်လည်း၊ တချို့မှာ ပြင်းထန်နိုင်ပါသည်။ ပြင်းထန်၍ အန္တရာယ်ရှိသော ဆီးလမ်းကြောင်း ရောဂါများ၏ အစသည် မပြင်းထန် လှသော ရောဂါလက္ခဏာများနှင့်သာ အစပြုလေ့ရှိသည်။ ဤစာအုပ်ကို ဖတ်ထားရုံမျှဖြင့် ရောဂါ လက္ခဏာများ ကို မှန်ကန်စွာ ဆုံးဖြတ်နိုင်ရန်၊ ခွဲခြားပြောပြရန် ခက်ခဲပေသည်။ ကျန်းမာရေးဝန်ထမ်းများ နှင့် ဆီးစစ်၊သွေးစစ်ချက် များ လိုအပ်ပေသည်။ ထို့ကြောင့် ကျန်းမာရေး ဝန်ထမ်းများ၊ ဆရာဝန်များနှင့် တိုင်ပင် ဆွေးနွေးသင့်သည်။

အဖြစ်များသော ဆီးလမ်းကြောင်းဆိုင်ရာ ပြဿနာများ

ဆီးလမ်းကြောင်း ပိုးဝင်ခြင်း အမျိုးသမီးများတွင် အဖြစ်အများဆုံး ဖြစ်သည်။ တခါတရံတွင် ဆီးလမ်းကြောင်း ပိုးဝင်ခြင်းသည် ကာမစပ်ယှက်မှုကြောင့် ကူးစက်နိုင်သည်။ ကိုယ်ခံအားနည်းသော အခြေအနေ (ဥပမာ ကိုယ်ဝန် ဆောင်ချိန်) များတွင်လည်း ဖြစ်ပွားနိုင်သည်။
ကျောက်တည်ခြင်း (ကျောက်ကပ် နှင့် ဆီးအိမ်)
ဆီးကျိတ်ယောင်ခြင်း အသက်ကြီးသော အမျိုးသားများတွင် အဖြစ်အများဆုံးသော ဆီးသွားရခက်ခဲသည့် ရောဂါဖြစ်သည်။
ဆီးပူညောင်းကျ ရောဂါ ကာမစပ်ယှက်မှုကြောင့် ဖြစ်ပွားပြီး ကူးစက်တတ်သော ရောဂါမျိုးဖြစ်သည်။ ဆီးသွားရ ခက်ခဲသော၊ ဆီးသွား လျှင် နာကျင်၊ ပူသော ရောဂါမျိုးဖြစ်သည်။
schistosomiasis ဟုခေါ်သော ရောဂါပိုးကြောင့် ဆီးတွင်းသွေးပါသော ရောဂါများ ဖြစ်တတ်သည်။

ဆီးလမ်းကြောင်း ပိုးဝင်ခြင်း

အမျိုးသမီး အများစုမှာ ဆီးလမ်းကြောင်း ပိုးဝင်ခြင်းကို ခံစားရလေ့ရှိသည်။ အမျိုးသားများတွင်မူ (အမျိုးသမီးများနှင့် နှိုင်းယှဉ်လျှင်) ဆီးလမ်းကြောင်း ပိုးဝင်ခြင်းမှာ အဖြစ်နည်းပါသည်။ ဆီးလမ်းကြောင်း ပိုးဝင်သော ရောဂါလက္ခဏာများမှာ ဆီးခဏခဏသွားရခြင်း၊ ဆီးသွားလျှင် နာခြင်း၊ ဆီးစပ် ကိုက်ခြင်း၊ ဆီးထဲတွင် သွေးပါခြင်းတို့ ဖြစ်သည်။ ရောဂါ ပိုဆိုးလာပါက ခါးအောက်ပိုင်းနာခြင်း၊ နံရိုးများထိ နာတက်လာခြင်း၊ ကိုယ်ပူခြင်း တို့ ဖြစ်တတ်သည်။

ကုသခြင်း

ရေများများသောက်ပါ။ မပြင်းထန်သော ဆီးပိုးဝင်ခြင်းများမှာ ဆေးဝါး အကူအညီ(များသောအားဖြင့်) မလိုအပ်ပဲ ရေများများ သောက်ခြင်းခြင့် ပျောက်ကင်းနိုင်ပါသည်။ ၃-၄ နာရီအတွင်း နာရီဝက်ခြားတစ်ခါ ရေ တစ်ဖန်ခွက် သောက်ပါ။ ရေများများ သောက်ခြင်း အလေ့အထကို ပြုလုပ်သင့်ပါသည်။ (သို့သော် လူနာသည် ဆီး လုံးဝ မသွားပါက (သို့မဟုတ်) နှလုံး(သို့) အခြားရောဂါ တခုခုကြောင့် ခြေထောက်၊ လက်၊ မျက်နှာများ ဖောယောင်နေပါက ရေများစွာ မသောက်သင့်ပါ။)
ရေများများသောက်ပါလျှက် မသက်သာလျှင် (သို့)ဖျားလျှင် ကိုထရိုင်မိုဇာဇော cotrimoxazole (သို့) အမောက်ဇာစီလင် amoxacillin သောက်နိုင်ပါသည်။ ရောဂါ အကင်းသေစေရန် (၁၀) ရက်ခန့် သောက်ရန် လိုအပ်နိုင်ပါသည်။ အထက်ပါဆေးများ သောက်ပါလျှက် မသက်သာလျှင် စီပရိုဖလောက်ဇာဆင် cilirolfoxacin သောက်နိုင်ပါသည်။
လူနာသည် မသက်သာသေးလျှင် ဆရာဝန်ထံပြပါ။

ကျောက်ကပ်၊ ဆီးအိမ်တွင် ကျောက်တည်ခြင်း

ရောဂါ လက္ခဏာများမှာ

ပြင်းပြင်းထန်ထန် ခါးအောင့်ခြင်း၊ ခါးကိုက်ခြင်း၊ ဆီးစပ်ကိုက်ခြင်း၊ အမျိုးသားများတွင် လိင်တံ အောက်ခြေ၌ အောင့်ခြင်း
တခါတရံတွင် ဆီးလမ်းကြောင်းတွင် ကျောက်နှင့် ပိတ်မိပြီး ဆီးသွားရခက်ခြင်း(သို့) ဆီး(လုံးဝ) မသွားနိုင်ခြင်း (သို့) ဆီး စသွားသောအခါတွင် သွေးစက်များ ပါခြင်းများ ဖြစ်တတ်ပါသည်။
တချိန်တည်းမှာပင် ဆီးပိုးဝင်သော လက္ခဏာများလည်း တွေ့ရတတ်သည်။

ကုသခြင်း

ဆီးလမ်းကြောင်း ပိုးဝင်ခြင်း ကုထုံး ကဲ့သို့ပင် ကုသပါ။
အကိုက်အခဲ ပျောက်ဆေးများ analgesic၊ ဗိုက်အောင့်ပျောက်ဆေး antispasmodic များ ဖြင့် ကုနိုင်သည်။
ဆီးမပေါက်နိုင်လျှင် အိပ်လျှက် ပေါက်ကြည့်ပါ။ အိပ်လျှက်ဆီးပေါက် ခြင်းဖြင့် ဆီးအိမ်ဝတွင် ပိတ်နေသောကျောက်သည် နောက်သို့ ပြန်လိမ့်သွားကာ ဆီးသွားလမ်းကြောင်းပြန် ပွင့်သွား နိုင်ပါသည်။
ရောဂါပြင်းထန်လျှင် ဆရာဝန်နှင့် ပြပါ။ ခွဲစိတ်မှု လိုအပ်ကောင်း လိုအပ်နိုင်ပါသည်။

ဆီးကျိတ်ကြီးခြင်း

အသက် ၄၀ ကျော် အမျိုးသားများတွင် ဆီးကျိတ်ကြီးခြင်း အဖြစ်များသည်။ ဆီးအိမ်နှင့် ဆီးပြွန်ကြားရှိ ဆီးကျိတ်ရောင်လာခြင်းကြောင့် ဖြစ်သည်။

ဆီးသွားရခက်ခြင်း အပြင် တစ်ခါတရံ ဝမ်းသွားရခက်တတ်သည်။ ဆီးသွားလျှင်လည်း တစ်စက် တစ်စက်ချင်း သာသွားနိုင်သည်။ ရက်အတန်ကြာထိ ဆီးလုံးဝ မသွားနိုင်ဖြစ်တတ်သည်။

ရောဂါပိုးတစ်ခုခု ဝင်လာလျှင် ကိုယ်ပူလာတတ်သည်။

ကုသခြင်း

အကယ်၍ လူနာဆီးမသွားနိုင်လျှင် ရေပူပူထည့်ထားသော ရေဇလုံထဲတွင် ပုံတွင်ပြထားသည့်အတိုင်း ထိုင်ရမည်။ ဤသို့ ပြုလုပ်ပြီး ဆီးမသွားနိုင်ပါက ဆီးပိုက်ထည့်ရမည်ဖြစ်သည်။

အကယ်၍ အဖျားရှိနေလျှင် အမ်ပီဆလင် ampicillin ၊ တက်ထရာဆိုက်ကလင်း tetracycline ကဲ့သို့ ပိုးသတ်ဆေးများ သောက်ရမည်။

ပြင်းထန်ပြီး နာတာရှည်ဖြစ်နေလျှင် ခွဲစိတ်ကုသရန် လိုအပ်နိုင်သည်။

သတိပြုရန်။ ။ ဆီးကြိတ်ရောဂါများနှင့် ဆီးပူညောင်းကျရောဂါ ၂ မျိုးလုံးတွင် ဆီးသွားရန် ခက်ခဲနိုင်ပါသည်။ လူကြီးများတွင် ဖြစ်ပါက ဆီးကြိတ်ကြီးသည့် ရောဂါပို၍ဖြစ်နိုင်ပါသည်။ အကယ်၍ လူငယ် တစ်ဦး ဆီးသွားရန် ခက်ခဲနေပါက (ဆီးပူညောင်းကျရောဂါပိုး (သို့) chlamydia ခေါ်သော ရောဂါပိုးရှိသောသူနှင့် လိင်ဆက်ဆံခဲ့ သောကြောင့်) ဆီးပူညောင်းကျရောဂါ ဖြစ်နိုင်ခြေ ပိုများသည်။

ကာလသားရောဂါများ Sexually Transmitted Diseases

လိင်ဆက်ဆံခြင်းကြောင့် ကူးစက်တတ်သော ရောဂါများမှာဆီးပူညောင်းကျရောဂါ၊ ကလမ်မိုင်ဒီယား chlamydia ရောဂါ၊ ဆစ်ဖလစ်ရောဂါ၊ ဘင်ထွက်ခြင်း (bubo) တို့ဖြစ်သည်။ ခုခံအားကျဆင်းမှု ကူးစက်ရောဂါ HIV/AIDS နှင့် မျိုးပွားအင်္ဂါ အနာပေါက်ခြင်းများ ကို အချပ်ပိုတွင် ကြည့်ပါ။

ဆီးပူညောင်းကျ ရောဂါ နှင့် ကလမ်မိုင်ဒီယား Chlamydia ရောဂါ

ထိုရောဂါများသည် လက္ခဏာ မပြဘဲ ယောကျာ်း၊ မိန်းမ ၂ မျိုးလုံးတွင် ဖြစ်နိုင်သည်။ ဆီးပူညောင်းကျ ရောဂါ သည် ပို၍လျှင်မြန်စွာ ကူးစက်၍ ပို၍နာတတ်သည်။ ကုသရာတွင် ယောကျာ်း၊ မိန်းမ နှစ်ယောက် တပြိုင်တည်း ကုသရန် လိုအပ်သည်။ မကုသဘဲနေလျှင် ယောကျာ်း၊ မိန်းမ နှစ်ယောက်လုံးတွင် မြုံသွားနိုင်သည်။ (ကလေးမရနိုင်ခြင်း ဖြစ်သည်။)

ရောဂါရှိသော ကိုယ်ဝန်ဆောင်မိခင် ကလေးမမွေးခင် မကုသဘဲ ထားပါက၊ မွေးဖွားလာသော ကလေးတွင် ထိုရောဂါပိုးကူးစက်ပြီး မျက်စိကွယ်တတ်သည်။

အမျိုးသားတို့တွင် ရောဂါရှိသူနှင့် လိင်ဆက်ဆံပြီး၊ ၂ ရက်မှ ၅ ရက်အတွင်း ရောဂါလက္ခဏာ ပေါ်တတ်သည်။ အမျိုးသမီးတို့တွင်မူ လပေါင်းများစွာ ကြာသည့်တိုင် ရောဂါလက္ခဏာ မပြပဲ ရှိနေတတ်သည်။ သို့သော် အခြားသူများကို ကူးစက်စေနိုင်သည်။

ကုသခြင်း

ဆီးပူညောင်းကျ ရောဂါကို ပင်နီဆလင် penicillin နှင့်ကုသကြသည်။ ယခုအခါ ဆေးယဉ်ပါးလာသည့် အတွက် ဆေးသစ်များ ရှာဖွေလာကြသည်။ ဆေးကုပြီး ၂၃ ရက်ကြာသည့်တိုင် မသက်သာပါက ဆေးမတိုးတော့သည့် ဆီးပူညောင်းကျရောဂါ ဖြစ်နေတတ်သည်။ သို့မဟုတ် ကလမ်မိုင်ဒီယား Chlamydia ဖြစ်နိုင်သည်။
ဆီးပူညောင်းကျရောဂါ(သို့) Chlamydia ရောဂါ ခံစားနေရသော အမျိုးသမီးတို့သည် ဖျားခြင်း၊ ဝမ်းအောက် ဗိုက်နာခြင်းစသော လက္ခဏာခံစားရပါက မျိုးပွားအင်္ဂါများ ယောင်ရမ်းသည့် ရောဂါ lielvic inflammatory disease ဖြစ်နိုင်သည်ကို သတိချပ်သင့်သည်။
ထိုရောဂါရှိသူသည် အိမ်ထောင်ဖက်ကိုလည်း တစ်ပြိုင်တည်း ကုသရမည်။ ဇနီးသည်ကို မကုပဲထားပါက၊ ခင်ပွန်းကို ပြန်ကူးစေလိမ့်မည်။
ရောဂါရှိသူ အမျိုးသမီး (ကိုယ်ဝန်ရှိပါက) မိခင်မှ ကလေးသို့ ကူးစက်နိုင်သဖြင့် ကြိုတင်ကာကွယ်ရ မည်။ သို့မဟုတ် ကလေး မျက်စိ ကွယ်တတ်သည်။

သတိပြုရန် ဆီးပူညောင်းကျ ရောဂါ နှင့် ကလမ်မိုင်ဒီယား Chlamydia ရောဂါ ဖြစ်သောသူများတွင် ဆစ်ဖလစ်ရောဂါလည်း (လက္ခဏာ မပြပဲ) ရှိနေတတ်သည်။ ထို့ကြောင့် ဆစ်ဖလစ်ရောဂါကုထုံးကိုလည်း တစ်ပြိုင်တည်း ပေးသင့်သည်။ ဆီးပူညောင်းကျ ရောဂါအတွက် ပေးသောဆေးများက ဆစ်ဖလစ်ရောဂါ လက္ခဏာများ မပေါ်ပဲ ငုတ်နေစေတတ်သည်။ ဆစ်ဖလစ်ရောဂါပိုးများ သေသွားသောကြောင့် မဟုတ်ပါ။

ဆစ်ဖလစ် Syphilis

ဆစ်ဖလစ်ရောဂါသည် လိင်မှ ကူးစက်တတ်သော အဖြစ်များပြီး အန္တရာယ်ရှိသည့် ရောဂါဖြစ်သည်။

လက္ခဏာ

ပထမဆုံး လက္ခဏာမှာ ချန်ဂါ chancre ဟုခေါ်သော ပြည်တည်နာ အဖု ပေါ်လာသည်။
ရောဂါရှိသူနှင့် လိင်ဆက်ဆံပြီး ၂ ပတ်မှ ၅ပတ်အတွင်း ပေါ်နိုင်သည်။ ၄င်း ချန်ဂါသည် အရည်ကြည်ဖုတစ်ခု (သို့) ပွန်းပဲ့အနာ တစ်ခုအနေနှင့် မြင်တွေ့ရမည်၊
အထူးသဖြင့် အမျိုးသား၊ အမျိုးသမီးတို့၏ လိင်အင်္ဂါတစ်ဝိုက်တွင် တွေ့ရမည်။ (ပါးစပ်၊ နှုတ်ခမ်း၊ လက်ချောင်း၊ စအိုဝ တို့တွင်လည်း တွေ့ရတတ်သည်၊)
၄င်းအနာတွင် ရောဂါပိုးများ အများအပြား ခိုအောင်းနေသဖြင့်၊ အခြားသူထံ ကူးစက်လွယ်သည်။ မျိုးပွားရာလမ်းကြောင်းတွင် ပေါ်တတ်သည်။
နာကျင်မှုမရှိခြင်းကြောင့်၊ အမျိုးသမီးများ၏ လိင်အင်္ဂါအတွင်းပိုင်းတွင် ဖြစ်နေပါက၊ အဆိုပါ အမျိုးသမီးကိုယ်တိုင် ရောဂါရှိမှန်းပင် မသိလိုက်ပဲ၊ တခြားသူများထံ ရောဂါ ကူးစက်နေစေမည်၊
၄င်းအနာမှ နာကျင်နေမည်ဆိုလျှင် ရှန်ဂရွိုက် chancroid ဟုခေါ်သည်။
အထက်ပါ အနာလက္ခဏာသည် ဆေးမကုသော်လည်း ရက်အနည်းငယ်အတွင်း အလိုလို ပျောက်သွားမည်။ သို့သော် ရောဂါပိုးမှာမူ တစ်ကိုယ်လုံးသို့ ဆက်လက်ပျံ့နှံ့နေမည်။
တစ်လခန့် ကြာသောအခါ လည်ချောင်းနာခြင်း၊ ကိုယ်ပူခြင်း၊ ပါးစပ်အနာပေါက်ခြင်း (သို့) အရိုးအဆစ် ယောင်ခြင်းများ ခံစားရမည်။ အရေးပြားပေါ်တွင် အနီစက်များ ပေါ်လာနိုင်သည်။

အဆိုပါ လက္ခဏာ များသည် အလိုလို ပျောက်သွားတတ်သည်။ ထိုအခါ ပျောက်သွားပြီ ဟုထင်မိတတ်သည်။ ရောဂါမှာမူ ဆက်လက် ဖြစ်နေသည်။ လုံလောက်သော ကုသမှု မရပါက ဆစ်ဖလစ်ပိုးသည် ခန္ဓာကိုယ်၏ အတွင်းသို့ ပျံ့သွားပြီး နှလုံးရောဂါ၊ လေဖြန်းခြင်း၊ ရူးသွပ်ခြင်း နှင့် တခြားသော ရောဂါများဖြစ်နိုင်သည်။

မှတ်ချက်။ ။ Yaws ဟုခေါ်သော ရောဂါတွင်တွေ့ရသော လက္ခဏာများသည် ဆစ်ဖလစ်ကဲ့သို့ပင် ဖြစ်သည်။

သတိပြုရန်။ လိင်အင်္ဂါတွင် အနာပေါက်ပြီး၊ ရက်အတန်ကြာတွင် ကိုယ်ခန္ဓာမှ အနီအင်ပြင်များပေါ်လာပါက ဆစ်ဖလစ်ဖြစ်နိုင်ခြေ များသည်။ ချက်ချင်းကုပါလေ။

ကုသခြင်း

လက္ခဏာပေါ်သည်မှာ ၁ နှစ် အတွင်းသာရှိသေးပါက 2.4 million Unit of benzathine penicillin ဘင်ဇာတင်း ပင်နီဆလင် တစ်ကြိမ်ထိုးပါ။ (တင်ပါး တစ်ဖက်ဆီတွင် တစ်ဝက်စီ ထိုးပါ) ။ အကယ်၍ penicillin နှင့် မတည့်ပါက တက်ထရာဆိုက်ကလင်း tetracycline သို့မဟုတ် အရီထရိုမိုင်ဆင် erythromycin 500 mg တစ်နေ့ ၄ ကြိမ် ၁၅ ရက် တိုက်ပါ။

လက္ခဏာပေါ်သည်မှာ ၁ နှစ် ထက်ကျော်နေပြီဆိုပါက 2.4 million Unit of benzathine penicillin ကိုတင်ပါး တစ်ဖက်ဆီတွင် တစ်ဝက်စီထိုး ပြီး၊ တစ်ပတ် တစ်ကြိမ်၊ ၃ပတ် ဆက်ထိုးပါ။ penicillin မတည့်ပါက tetracycline or erythromycin 500 mg တစ်နေ့ ၄ ကြိမ် ၃၀ ရက် ပေးပါ။

သံသယ ရှိပါက သွေးစစ်ကြည့်နိုင်သည် သွေးစစ်ရန် အလွယ်တကူမရရှိနိုင်ပါက အထက်ပါ နည်းလမ်း အတိုင်း ကုသနိုင်သည်။

ရောဂါပိုးရှိသူ၏ အိမ်ထောင်ဖက်ကိုလည်း ကုသရမည်။

မှတ်ချက်။ ။ Penicillin နှင့် မတည့်သော ကိုယ်ဝန်ဆောင် မိခင်(သို့) နို့တိုက် မိခင် တို့ကိုလည်း တူညီသော ဆေးအချိုး အတိုင်း tetracycline တိုက်နိုင်သည်။

ဘင်ထွက်ခြင်း Bubos: Bursting Lymph Nodes in the Groin (Lymphogranuloma Venereum)

လက္ခဏာ

ယောကျာ်းနှင့် မိန်းမတို့တွင် ပေါင်ခြံ၌ ပြည်တည်နာဖြစ်မည်။ ပေါက်ထွက်ပြီး၊ အမာရွတ်ကျန်ခဲ့မည်။ နောက်ထပ်တဖန် ပြန်ပေါက်မည်။

မိန်းမတို့တွင် စအို၌ အနာစိုများ ပေါ်မည်။

ကုသခြင်း

ကျန်းမာရေးဝန်ထမ်းနှင့် ပြသရန်

Erythromycin ၅၀၀ မီလီဂရမ်၊ တစ်နေ့ ၄ကြိမ် ၁၄ ရက်မှ ၂၁ရက် (သို့)
Doxycycline ၁၀၀ မီလီဂရမ်၊ တစ်နေ့ ၂ ကြိမ် ၁၄ ရက်မှ ၂၁ရက်ထိ

လုံးဝ ပျောက်ကင်းသည်အထိ လိင်ဆက်ဆံမှု ရှောင်ရန်။

မှတ်ချက်။ ရှန်ဂရွိုက် chancroid ကြောင့်လည်း ဘင်ထွက်တတ်သည်။

ကာလသားရောဂါများကို ကာကွယ်ခြင်း

ဘယ်သူနဲ့ လိင်ဆက်ဆံနေသလဲ။ လူအများအပြားဖြင့် လိင်ဆက်ဆံလေ့ ရှိသူများသည် ရောဂါပိုမို ကူးစက်လွယ်သည်။ ထို့ကြောင့် ပြည့်တန်ဆာများသည် ရောဂါပိုမို ရလွယ်ပြီး အခြားသူများကိုလည်း ရောဂါတဆင့် ပြန်လည် ကူးစက်စေသည်။ ရောဂါကူးစက်မှုကို ကာကွယ်ရန် မိမိ အိမ်ထောင်ဖက် ပေါ် သစ္စာရှိပါ။ သို့ လိင်ဆက်ဆံတိုင်း ကွန်ဒုံးသုံးပါ။
ရောဂါ ကူးစက်ခံရပါက ကုသမှုချက်ချင်း ခံယူပါ။ ရောဂါ ကူးစက် ခံရသူများသည် အခြားသူများအား ပြန်လည် မကူးစက်စေရန် ချက်ချင်း ကုသမှု ခံယူရန် အရေးကြီးသည်။ လိင်မှတဆင့် ကူးစက်တတ်သော ရောဂါတစ်ခု ခံစားရပါက အခြားကာလသား ရောဂါများနှင့် ခုခံကျ ကာလသားရောဂါပိုး HIV များ အလွယ်တကူ ကူးစက်ခံရနိုင်ပါသည်။ ဆေးကုသမှု ခံယူပြီး (၃) ရက်ကြာသည်အထိ လိင်ဆက်ဆံခြင်း မပြုလုပ်ရပါ။ (ယခုအချိန်အထိ HIV ရောဂါပိုးအား ပျောက်ကင်းအောင် ကုသရန် ဆေးမရှိသေးပါ။)
ဆေးကုရန် လိုအပ်သော အခြားသူများကိုလည်း အသိပေးပါ။ တစုံတယောက်သည် လိင်မှတဆင့် ကူးစက်တတ်သော ရောဂါ တစ်ခု ခံစားရပါက မိမိနှင့် လိင်ဆက်ဆံဖက် အဖော်များကိုလည်း အသိပေးရမည်။ သို့မှသာ ယင်းအဖော်များသည်လည်း ဆေးကုသမှု ခံယူနိုင်မည် ဖြစ်သည်။ အထူးသဖြင့် အမျိုးသားများသည် အမျိုးသမီးများအား အသိပေးရန် အရေးကြီးသည်။ အကယ်၍ အမျိုးသမီးသည် မိမိတွင် ရောဂါရှိမှန်း မသိပါက ၄င်းမှတဆင့် အခြားသူများအား ကူးစက်စေနိုင် သကဲ့သို့ မိမိ၏ ကလေးကိုလည်း ကူးစက်စေနိုင်ပြီး မျက်စိကွယ် နိုင်သည်။ အမျိုးသမီးကိုယ်တိုင်လည်း အပြင်း အထန် နာမကျန်းဖြစ်နိုင်သည်။
အခြားသူများကိုလည်း ကူညီပါ။ လိင်မှတဆင့် ကူးစက်တတ်သော ရောဂါ ခံစားနေရသူ အသိမိတ်ဆွေများအားလည်း ဆေးကုသမှု ချက်ချင်း ခံယူရန် သတိပေးပါ။ ရောဂါပျောက်ကင်းသည်အထိ လိင်ဆက်ဆံမှု မပြုလုပ်ရန်လည်း အသိပေးရမည်။

ဆီးပိုက်ကို အသုံးပြုရမည့် အချိန် နှင့် အသုံးပြုပုံ (ဆီးချူပိုက်)

သုံးသင့်သည့် အချိန်နှင့် မသုံးရမည့်အချိန်

မလိုအပ်ပါက လုံးဝ အသုံးမပြုသင့်ပါ။ ဆီးပိုက်ကို စနစ်တကျ နှင့် ဂရုတစိုက် အသုံးပြုလျှင်တောင်မှ ဆီးလမ်းကြောင်း ပိုးဝင်ခြင်းနှင့် ဆီးလမ်းကြောင်း ထိခိုက်မိခြင်းတို့ ဖြစ်စေနိုင်သည့်အတွက် တတ်ကျွမ်းနားလည်သူများ၏ အကူအညီကို အချိန်မှီ ရယူရန် အရေးကြီးသည်။
ဆီးသွားနိုင်နေသမျှကာလပတ်လုံး ဆီးပိုက်ကို အသုံးမပြုရပါ။
ဆီးမသွားနိုင်ပါက ရေနွေးဇလုံထဲတွင်ထိုင်ပြီး ဆီးသွားနိုင်ရန် ပထမဆုံး ကြိုးစားရမည်။
ဆီးပူညောင်းကျ သို့မဟုတ် ဆီးကျိတ်ပြဿနာ ကြောင့် ဖြစ်ပါက သင့်တော်သော ဆေးကုသမှု ချက်ချင်း ခံယူရမည်။
အကယ်၍ ဆီးအိမ်ဖောင်းတင်းနာကျင်နေပြီး ဆီးမသွားနိုင်ပါက သို့မဟုတ် ဆီးအဆိပ်တက်ခြင်း လက္ခဏာများ စတင်ခံစားလာရပါက ဆီးပိုက်ကို အသုံးပြုနိုင်သည်။

ဆီးအဆိပ်တက်ခြင်း လက္ခဏာများ (Uremia)

လူနာရှူထုတ်သော လေတွင် ဆီးအနံ့ကဲ့သို့သော အနံ့ရခြင်း၊
မျက်နှာ နှင့် ခြေထောက်များ ဖောယောင်ခြင်း၊
အန်ခြင်း၊ မောခြင်း၊ မှိန်းခြင်း၊

မှတ်ချက်။ ။ ဆီးသွားရခက်ခြင်း၊ ဆီးကျိတ်ကြီးခြင်း၊ ဆီးကျောက် ဝေဒနာများ ခံစားနေရသူများသည် အရေးပေါ် အခြေအနေတွင် အဆင်သင့် အသုံးပြုနိုင်ရန် ဆီးပိုက်ကို ဝယ်ယူပြီး ဆောင်ထားသင့်သည်။

ဆီးပိုက် ထည့်နည်း

အမျိုးသမီးများတွင် ကလေးမီးဖွားပြီး ၆ နာရီကျော်ထိ ဆီးအိမ်တင်းပြီး ဆီးမသွားပါက ဆီးပိုက် ထည့်ပါ။ ဆီးအိမ်မတင်းပါက ရေများများ သောက်ခိုင်းရမည်။

အမျိုးသမီးများနှင့် သက်ဆိုင်သောရောဂါများ

အဖြူဆင်းခြင်း (မိန်းမကိုယ်မှ အရည်ကြည် (သို့) ပြည်ရည်ထွက်ခြင်း)

ပုံမှန်အားဖြင့် အမျိုးသမီး အားလုံးသည် အရည်ကြည်(သို့) နို့နှစ်ရောင်(သို့)အဝါဖျော့ရောင် အစရှိသဖြင့် မိန်းမ ကိုယ်မှ အဖြူအနည်းငယ်ဆင်းလေ့ရှိသည်။ ယားယံခြင်း၊ အနံ့ဆိုးများထွက်ခြင်း မရှိလျှင် အဖြူဆင်းခြင်းသည် ပုံမှန်အားဖြင့် ပြဿနာမဟုတ်ပါ။

အမျိုးသမီးအများစု အထူးသဖြင့် ကိုယ်ဝန်ဆောင် အမျိုးသမီးများသည် ယားယံသောအဖြူဆင်းခြင်းမျိုး ခံစားရ တတ်သည်။ ၄င်းမှာ ရောဂါပိုး အမျိုးမျိုးကြောင့် ဖြစ်နိုင်သည်။ အများစုမှာ စိတ်အနှောင့်အယှက် ဖြစ်စေ သော် လည်း အန္တရာယ် မဖြစ်စေပါ။ သို့သော်လည်း ဆီးပူညောင်းကျ gonorrhea နှင့် chlamydia ဟုခေါ် သော ရောဂါ ပိုးကြောင့် ဖြစ်သော အဖြူဆင်းခြင်းသည် ကလေးမီးဖွားချိန်တွင် ကလေးအား အန္တရာယ် ဖြစ်စေ သည်။

၁။ စိမ်းဝါရောင် (သို့) အဖြူရောင်ရှိပြီး အမြှုပ်များ ပါဝင်၍ အရည်ကျဲကျဲဆင်း၍ ယားယံပြီး အနံ့ဆိုးများရှိသော အဖြူဆင်းခြင်း Trichomonas

ယင်းမှာ ထရိုင်ကိုမိုနပ်စ် trichomonas ဟုခေါ်သော ရောဂါပိုး တစ်မျိုးကြောင့်ဖြစ်သည်။ ဆီးပူတတ်သည်။ တခါတရံ မိန်းမကိုယ်သည် ယောင်ယမ်းကာ နာကျင်နေတတ်သည်။ အဖြူဆင်းရာတွင် သွေးစများ ပါနိုင်သည်။

ရောဂါကုထုံး

မိန်းမကိုယ် ကိုသန့်ရှင်းစွာထားရန် အရေးအကြီးဆုံးဖြစ်သည်။

မိန်းမကိုယ်ကို ဆေးပေးရမည်။ douche ဟုခေါ်သည်။ ပေါင်းခံထားသော ရှာလကာရည်နှင့် ရေနွေးရောစပ်ပြီး မိန်းမကိုယ်အတွင်းပိုင်းသို့ ဆေးပိုက်ဖြင့် သန့်ရှင်းရေး လုပ်ခြင်းဖြင့် သက်သာစေနိုင်ပါသည်။ အကယ်၍ရှာလကာရည် မရှိပါက သံပုရာရည်ကို အသုံးပြုနိုင်ပါသည်။

မှတ်ချက်။ ။ဆေးရည်ကို မိန်းမကိုယ် အတွင်းပိုင်းသို့ ၃ မိနစ်ခန့်ကြာအောင် ဖြည်းညှင်းစွာ ထည့်ရမည်။ ဆေးပြွန်ကို မိန်းမကိုယ် အတွင်းပိုင်းသို့ ၃လက်မထက် ပို၍ မသွင်းရ။

သတိ။ ။ကလေးမွေးဖွားရန် (၄) ပတ် အလိုနှင့် မွေးဖွားပြီး (၆)ပတ်အတွင်း အသုံးမပြုရပါ။ လိုအပ်ပါက နီစတက်တင် nystatin ဟုခေါ်သော မိန်းမကိုယ်အတွင်းထည့်သော ဆေးကို အသုံးပြုနိုင်သည်။

ကြက်သွန်ဖြူအမွှာကို ပုံမပျက်၊ အခွံနွှာ၍ သန့်ရှင်းသော အဝတ်စ(သို့) ပတ်တီးစဖြင့် ပတ်၍ မိန်းမ ကိုယ်အတွင်းပိုင်းသို့ ထည့်နိုင်သည်။
နေ့ပိုင်းတွင် အထက်ပါ ဆေးရည်ဖြင့် (၂)ကြိမ်ဆေးပြီး ညပိုင်းတွင် ကြက်သွန်ဖြူထည့်ခြင်းကို (၁၀)ရက်မှ (၁၄)ရက် ထိ လုပ်နိုင်သည်။
ယင်းဖြင့် မသက်သာပါက ထရိုင်ကိုမိုနပ်စ် trichomonas ပိုးကို နိုင်သော metronidazole မက်ထရိုနိုက်ဒါဇော ဆေးပါဝင်သည့် မိန်းမကိုယ်အတွင်း ထည့်ဆေး သုံးနိုင်သည်။ metronidazole မက်ထရိုနိုက်ဒါဇော သောက်ဆေးလည်း သောက်နိုင်သည်။

မှတ်ချက်။ ။ ထရိုင်ကိုမိုနပ်စ် trichomonas ပိုးကြောင့် ဖြစ်သော အဖြူဆင်းခြင်းရောဂါရှိနေသည့် အမျိုးသမီး၏ ခင်ပွန်းသည် သည် ရောဂါလက္ခဏာ မပြ လျှင်တောင်မှ ရောဂါရှိနေတတ်သည်။ ရောဂါရှိသော အမျိုးသားအချို့မှာ ဆီးပူ ဆီးကျဉ်ခြင်းဖြစ်နိုင်သည်။ အမျိုးသမီးကို metronidazole မက်ထရိုနိုက်ဒါဇော ဆေးဖြင့် ကုသနေချိန်တွင် အမျိုးသားသည်လည်း တချိန်တည်းတွင် ယင်းသောက်ဆေးဖြင့် ကုသသင့် သည်။

၂။ မှိုတက်သည့်အနံ့ ရှိပြီး ချိ(စ်) သို့ ထောပတ်နှစ်ရောင်ရှိသော အဖြူဆင်းခြင်း

Moniliasis, Candida မိုနီလီယေးစစ်နှင့် ကင်ဒီဒါ ဟုခေါ်သော မှိုများကြောင့် ဖြစ်နိုင်သည်။ မိန်းမကိုယ် အလွန် ယားယံလေ့ရှိသည်။ မိန်းမကိုယ် နခမ်းသားများ နီရဲနေတတ်ပြီး၊ နာကျင်နေမည်။ ဆီးလည်း ပူမည်။ ကိုယ်ဝန်ဆောင်မိခင်၊ ဆီးချိုရောဂါရှိသူ၊ ကိုယ်ခံအားကျဆင်းသူ၊ ကိုယ်ဝန် တားဆေး သောက်နေသူ၊ ကာလ အတန်ကြာ ပဋိဇီဝဆေးများ သောက်နေသူများတွင် တွေ့ရလေ့ရှိသည်။

ကုသချက်။ ။ မိန်းမကိုယ်ကို ရှာလကာဖျော်ရည်ဖြင့်ဆေးနိုင်သည်။ သို့မဟုတ် မိန်းမကိုယ်ထဲသို့ မှိုသတ်ဆေး တစ်မျိုးမျိုးထည့်ခြင်း Gentian Violet ဆေးရည်ပျော့ (Gentian Violet ဆေး ၂ ဆကို ရေ အဆ ၁၀၀ နှင့် ရောစပ်ဖျော်ခြင်း) ဖြင့်လည်းကုသနိုင်သည်။ နီစတက်တင် Nystatin၊ မီကိုနာဇော Miconazole၊ ကလိုထရိုင်မဇော Clotrimazole စသည့်ဆေးများ တစ်ခုခုပါသည့် မိန်းမကိုယ်တွင်းထည့် ဆေး တစ်မျိုးမျိုးကို သုံးနိုင်သည်။ သကြားမထည့်ရသေးသည့် ဒိန်ချဉ်ကို အိမ်တွင်းဆေးမြီးတို အဖြစ် မိန်းမကိုယ်အတွင်းထည့်လျှင်လည်း ပျေက်ကင်းပါသည်။ ပဋိဇီဝဆေးများ Antibiotics လုံးဝ(လုံးဝ) မတိုက်ရပါ။ ပိုဆိုးစေတတ်ပါသည်။

၃။ ဆီးချေးနံ့ထွက်သော အဖြူပြစ်ဆင်းခြင်း

ဘက်တီးရီးယားပိုးကြောင့်ဖြစ်သည်။ ထရိုင်ကိုမိုနပ်စ် trichomonas ပိုးကြောင့် မဟုတ်ကြောင်း သေချာပါစေ။

ကုသခြင်း။ ။မိန်းမကိုယ်ကို ရှာလကာဖျော်ရည်ဖြင့်ဆေးနိုင်သည်။ သို့မဟုတ် povidone iodine (ဘီတာဒင်း Betadine လက်ဖက်ရည်ဇွန်း ၆ ဇွန်းကို ရေတစ်လီတာဖြင့် ရောပါ။) ဖြင့်ဆေးနိုင်သည်။ သို့မဟုတ် ကြက်သွန်ဖြူဥ တစ်မွှာကို မိန်းမကိုယ်ထဲသို့ ညစဉ် နှစ်ပတ်ခန့် ထည့်နိုင်သည်။ နောက်ဆုံးမရလျှင် metronidazole မက်ထရိုနိုက်ဒါဇော ကို သုံးနိုင်သည်။

၄။ ဆီးစပ်အောင့်ပြီး သွေးစသွေးနများပါသော(အနံ့နံ) ညိုညစ်ညစ် အရောင်များဆင်းခြင်း

ဆိုးရွားသော ပိုးဝင်ခြင်းကြောင့် ဖြစ်နိုင်သည်။ ကင်ဆာရောဂါကြောင့် ဖြစ်နိုင်သည် (ဥပမာ သားအိမ်ခေါင်း ကင်ဆာ)။ ကိုယ်ပူလျှင် ပိုးသတ်ဆေး (ampicillin အမ်ပီဆလင် နှင့် tetracycline တက်ထရာဆိုက်ကလင်း) သောက်ပါ။ သို့မဟုတ် ဆရာဝန် နှင့် ကုပါလေ။

အရေးကြီးသည်။ ။ အမျိုးသမီးများ ရက်ရှည်လများ အဖြူဆင်းနေလျှင် ကျန်းမာရေးဝန်ထမ်းနှင့် သေချာ ပြသပါ။

အမျိုးသမီးများတွင် ရောဂါကာကွယ်ရေး နည်းလမ်းအချို့

မိန်းမကိုယ် တဝိုက်ကို သန့်ရှင်းစွာ ထားပါ။ နေ့စဉ် ရေချိုးတိုင်း ကောင်းစွာ ဆေးကြော သန့်စင်ပါ။
လိင်ဆက်ဆံပြီး နောက် ဆီးသွားပါ။ ဆီးပိုးဝင်ခြင်းကို ကာကွယ်နိုင်ပါသည်။ (ကိုယ်ဝန် မရအောင် လုပ်ခြင်းမဟုတ်ပါ)
ဝမ်းသွားပြီးတိုင်း ကောင်းစွာ ဆေးကြောသန့်စင်ပါ။ ထိုသို့ ဆေးကြောသန့်စင်ရာတွင် မိန်းမကိုယ် ဘက်သို့ ဆေးကြောခြင်းမပြုလုပ်ရ။

ရောဂါပိုးများ မိန်းမကိုယ်မှတဆင့် ဆီးလမ်းကြောင်းသို့ ဝင်ရောက်နိုင်သည်။ မိန်းမကိုယ်မှ ဝေးရာသို့ တစ်နည်းအားဖြင့် အနောက်ဖက်သို့ ဆေးကြောသန့်စင်ပါ။ ကလေးများကိုလည်း ထိုသို့ပြုလုပ်ရန် မိဘများမှ ကောင်းစွာ သင်ကြားပြပေးပါ။

အမျိုးသမီးများ ဝမ်းဗိုက် အောက်ပိုင်း နာကျင်ခြင်း

ရောဂါအမျိုးမျိုး၊ အကြောင်းအမျိုးမျိုးကြောင့် နာတတ်သည်။ အဖြစ်များသော ရောဂါများမှာ

ဓမ္မရာသီကြောင့် နာကျင်ခြင်း ။ ။ရာသီလာစဉ်(သို့) မလာခင် ပိုနာတတ်သည်။
ဆီးအိမ်ပိုးဝင်ခြင်း ။ ။ဆီးခဏခဏသွားရခြင်း၊ ဆီးသွားရာတွင် နာကျင်ခြင်း။
မျိုးပွားအင်္ဂါများ ရောင်ရမ်းခြင်း။ ။Gonorrhoes ဂနိုပိုး (သို့) Chlamydia ပိုးများဝင်ခံရပြီး၊ သေချာမကုပဲထားပါက မျိုးပွားအင်္ဂါများ ရောင်ရမ်း တတ်သည်။ ဆီးစပ်နှင့် ဝမ်းဗိုက်အောာက်ပိုင်းနာပြီး၊ ကိုယ်ပူတတ်သည်။ ကလေးမွေးပြီးကာစ၊ ကိုယ်ဝန် ပျက်ကျပြီးကာစ၊ သားအိမ်တွင် သန္ဓေတားပစ္စည်းထည့်ပြီးကာစ အချိန်များတွင်လည်း ဖြစ်တတ်သည်။ သားအိမ်တွင်းထည့်သည့် သန္ဓေတားပစ္စည်းကြောင့် ဖြစ်ပါက ထိုပစ္စည်းကို ထုတ်ပစ်ရမည်။ Gonorrhoes ဂနိုပိုး (သို့) Chlamydia ရောဂါပိုးတို့ကို ကုပါ။ ထိုအပြင် metronidazole မက်ထရိုနိုက်ဒါဇော ၅၀၀ မီလီဂရမ်၊ တစ်နေ့ ၃ ကြိမ်၊ ၁၄ ရက်တိုက်ရမည်။
အလုံးရှိခြင်း။ ။သားဥ အရည်ကြည်အိတ်ဖြစ်ခြင်းနှင့် ကင်ဆာရောဂါတို့ ဖြစ်နိုင်သဖြင့် ဆရာဝန်နှင့် သေချာပြရမည်။
ကိုယ်ဝန်နေရာ မှားတည်ခြင်း။ ။လွန်ခဲ့သည့် တစ်လအတွင်း ကိုယ်ဝန်ဆောင်သည့် လက္ခဏာများကို တွေ့ရမည်။ လတ်တစ်လောတွင်မူ သွေးဆင်းခြင်း၊ လွန်စွာနာကျင်ခြင်း၊ စသည်တို့ကို ဖြစ်မည်။ အသက်အန္တရာယ်ရှိသည်။ ဆေးရုံ ချက်ချင်းပို့ပါ။
ကိုယ်ဝန်ပျက်ကျခြင်း၏ နောက်ဆက်တွဲ ဆိုးကျိုးများ။ ။ ဖျားခြင်း၊ မိန်းမကိုယ်မှသွေးဆင်းခြင်း၊ ဆီးသွားရခက်ခဲခြင်း၊ သွေးလန့်ခြင်း စသည်တို့ ဖြစ်တတ်သည်။ အသက် အန္တရာယ်ရှိသည့် အတွက် ဆေးရုံတွင် ကုသရမည်။ ပိုးသတ်ဆေး တစ်ခုခု ပေးထားသင့်သည်။
အူမကြီးနှင့် အူမကြီး ပိုးဝင်ခြင်း။ ။ အစာစားရာတွင် နာကျင်ခြင်း၊ ဝမ်းသွားလိုလျှင် နာကျင်ခြင်း ရှိမရှိ ဆန်းစစ်ရမည်။

အထက်ပါ ပြဿနာများတွင် တချို့သည် ပြင်းထန်ပြီး တချို့မှာ သိပ်မဆိုးတတ်ပေ။ သို့သော် မည်သည်ကြောင့် ဖြစ်သည်ကိုမသိ၍ သော်လည်းကောင်း၊ မသက်သာ၍သော်လည်းကောင်း၊ ကျန်းမာရေးဝန်ထမ်းများ ထံ ပြသရမည်။

အမျိုးသား၊ အမျိုးသမီးများတွင် ကလေးမရနိုင်ခြင်း (မြုံခြင်း)

အချို့သော စုံတွဲများသည် ကလေးရရန် ကြိုးပမ်းကြသော်လည်း ကိုယ်ဝန်မရနိုင်ဘဲ ရှိနေကြသည်။ ယောကျာ်း (သို့) မိန်းမ တစ်ယောက်ယောက်သည် မြုံခြင်း ဖြစ်နိုင်သည်။ အများအားဖြင့် မျိုးပွားနိုင်ရန် အကူအညီ မပေးနိုင် သော်လည်း တချို့ကိစ္စရပ်များတွင်မူ ရောဂါအပေါ်မူတည်၍ အကူအညီ ပေးနိုင်ပေသည်။

အဖြစ်များသော ကလေးမရနိုင်သည့် အဓိကအကြောင်းအရာများ

မြုံခြင်း (Sterility)

ခန္ဓာကိုယ် ချို့ယွင်းချက်ကြောင့် ကလေးမရနိုင်သော အမျိုးသား(သို့)အမျိုးသမီးကို ဆိုလိုခြင်းဖြစ်သည်။ မွေးရာပါ ချို့ယွင်းချက် ဖြစ်နေတတ်သည်။

အားနည်းခြင်း(သို့) အာဟာရ ချို့တဲ့ခြင်း

သွေးအား အလွန်နည်းခြင်း၊ အာဟာရချို့တဲ့ခြင်း၊ အိုင်အိုဒင်းဓါတ် နည်းပါးခြင်းတို့သည် (ပဋိသန္ဓေ တည်ခြင်း) ကိုယ်ဝန် မရပဲ ဖြစ်နေတတ်သည်။ ကိုယ်ဝန်ရလာသည့်တိုင် သားပျက်၊ သားလျော ဖြစ်စေနိုင်သည်။ အဆိုပါ အမျိုးသမီးများသည် အာဟာရ ပြည့်ဝသည့် အစားအစာများကို စားသောက်ခြင်း၊ အိုင်အိုဒင်း ပါသော ဆားများ ကို စားသုံးခြင်း၊ သွေးအားတက်ရန် သံဓါတ် ပါသော ဆေးများကို စားသုံးခြင်း စသည်ဖြင့် ကုသပေးသင့်သည်။ ဤကဲ့သို့ စားသုံးခြင်းက အိမ်ထောင်ရှင်မတစ်ယောက်၏ ကိုယ်ဝန်ရခြင်း၊ (သို့) ကျန်းမာသော ကလေးရရှိရေး တွင် အထောက်အကူ ပြုပေးလိမ့်မည်ဖြစ်သည်။

နာတာရှည် ရောဂါပိုးများ ကူးစက်ခံနေရခြင်း

အထူးသဖြင့် အမျိုးသမီး အတွင်းအင်္ဂါများ ယောင်ယမ်းခြင်းသည် ကာလသားရောဂါ၊ ဆီးပူညောင်းကျ ရောဂါ များကြောင့် ဖြစ်နိုင်သည်။ ထိုရောဂါများ ရှိပါက ပဋိသန္ဓေတားခြင်းကို တားဆီးစေနိုင်သည့် အချက်ပင် ဖြစ်သည်။ ရောဂါကို သိသိချင်း ဆေးကုသမှုခံယူရန် လိုအပ်သည်။ ကာကွယ်ခြင်းသည်ကား ကုသခြင်းထက် ပိုထိရောက်သည်။

အမျိုးသားများ

အမျိုးသားများတွင် သုတ်ပိုး ကောင်ရေ နည်းနေခြင်းကြောင့်လည်း အမျိုးသမီးများ ကိုယ်ဝန်မရနိုင်ပေ။ အခြားနေ့ များတွင် ကာမ မစပ်ယှက်ပဲ၊ သုက်ပိုးများကို စုဆောင်းထားကာ၊ အမျိုးသမီး၏ ဓမ္မတာ နှစ်ခုကြား (တစ်လနှင့် တစ်လကြား) အလယ်ရက်များတွင် ကာမစပ်ယှက်မှု ပြုပါက ကလေးရဖို့ အခွင့်အရေးပိုများ နိုင်ပါမည်။

အထူးသတိပေး တားမြစ်ချက်

ဟော်မုန်း နှင့် အခြားဆေးများ သောက်သုံးခြင်းသည် ကလေးရစေခြင်းအတွက် ထိရောက်သော အထောက် အကူ ပြုနိုင်မည် မဟုတ်ပေ။ အိမ်တွင်းဖြစ် ဆေးမြီးတိုများနှင့် အခြား ဥုံဖွ နည်းလမ်းများသည်လည်း ထူးခြားစွာ ထိရောက်လိမ့်မည် မဟုတ်ပေ။ ထို့ကြောင့် ထိုအရာများတွင် ပိုက်ဆံအကုန်ကျမခံသင့်ပေ။

ကလေးမရရှိသော စုံတွဲများသည် စိတ်ညစ်၊ စိတ်မကောင်းဖြစ်ရန် မလိုအပ်ပေ။ ကလေးများ၏ ဘဝကို ထောက်ပံ့ခြင်း၊ မြႇင့်တင်ခြင်းဖြင့် ပျော်ရွင်သော ဘဝကို ရနိုင်ပေသည်။

မိဘမဲ့ကလေးများ၊ အိမ်ယာမဲ့ကလေးများကို မွေးစားခြင်းဖြင့် ကလေးများကို ပြုစုစောင့်ရှောက်နိုင် သည်။ စုံတွဲ အများစုသည် ထိုကလေးများကို မိမိ၏ သားသမီး အရင်းကဲ့သို့ ပြုစုရင်းဖြင့် ပျော်ရွင်သော ဘဝကို တည်ဆောက်သွားကြသည်။
စေတနာ ကျန်းမာရေး ဝန်ထမ်း အဖြစ် ရပ်ရွာအရေးများတွင် ပါဝင် ကူညီ လုပ်ဆောင်နိုင်သည်။ ဤသို့ လုပ်ဆောင်ခြင်းဖြင့် သင့်ကလေးထံ မပေးလိုက်ရသော သင်၏ ချစ်ခြင်းမေတ္တာများကို အများအား မျှဝေပေးနိုင်သည်။
အများက သင့်အား ကလေးမရှိခြင်းကြောင့် ရှုတ်ချနေမည်ဆိုကြပါစို့။ သင်သည် လူမှုကူညီမှုရေး အဖွဲ့အစည်းများ ဖွဲ့စည်းပြီး လိုအပ်နေသာ နေရာများကို ကူညီခြင်းဖြင့်၊ ကလေးမရှိလည်း အဓိပ်ပာယ်ရှိသော ပြည့်စုံသည့် ဘဝတစ်ခု တည်ဆောက်နိုင်ကြောင်း၊ တန်ဖိုးရှိသည့် အမျိုးသမီးတစ်ဦးအဖြစ် ရပ်တည်နိုင်ကြောင်း သက်သေပြနိုင်သည်။